Los Angeles

Los Angeles (Los Angeles u LA en abreviadura en anglés; en aragonés sería Os Ánchels) ye una ciudat d'os Estaus Unius situada en o estato de California, en a costa de l'oceano Pacifico y a bels 150 kilometros a lo norte d'a muga con Mexico. Ye a capital d'o condau de Los Angeles. A suya población ye de 3.957.875 d'habitants en una superficie de 1.290,60 km², con una densidat de población de 3.041,30 hab/km². Por o suyo numero de habitants, Los Angeles ye a segunda ciudat mas gran en os Estaus Unius dimpués de Nueva York. En a suya aria metropolitana viven bels 16 millions de personas. Respective d'a superficie que ocupa, ye a primera ciudat de Norteamerica y una d'as mayors d'o mundo. L'amplaria dende a suya estrimera norte dica la suya estrimera sud ye de bels 100 kilometros. En a ciudat se troban cuantos puestos famosos. O mas conoixiu ye o barrio de Hollywood, centro d'a industria d'o cine en os Estaus Unius. Antiparte, ye una ciudat olimpica, en estar a seu d'os Chuegos Olimpicos de Los Angeles de 1932 y d'os Chuegos Olimpicos de Los Angeles de 1984. Conta con l'aeropuerto internacional de Los Angeles.